Mae Glandwr yn dyddio nol i 1809, ceir tystiolaeth o'r dyddiad hwnnw wedi ei gerfio ar y trawst uwchben y lle tân mawr. Adeiladwyd Glandwr gan John Lloyd-Williams, perchennog stad Gwernant, a thirfeddiannwr mawr yn Sir Aberteifi, fel ty haf yn Nhresaith iddo ef a'i deulu.

 

Erbyn diwedd y 19eg Ganrif, roedd Glandwr yn cael ei rentu i Benjamin Evans, cyfreithiwr yng Nghastell Newydd Emlyn. Roedd ei ferch Ann Adaliza Evans yn un o nofelwyr amlyca'i hoes, yn sgrifennu o dan y ffugenw Allen Raine. Mor boblogaidd oedd ei nofelau ym Mhrydain, America ac Ewrop fel y troswyd rhai o'i storiau am fywyd gwledig yng Nghymru i ffilmiau mud cynnar.

 

Roedd gan Allen Raine gysylltiadau agos iawn a Glandwr, ac yn 1872, yn 36 oed oddi yma y gadawodd yn ei phoni a trap i fynd i briodi a'i gwr Beynon Puddicombe yn eglwys hynafol San Mihangel Penbryn.